San Nicolaas - 24 augustus 2009 -

Diasabra ultimo na Instituto Medico San Nicolas (IMSAN) a tuma lugar un curso di CPR pa miembronan di Prensa. Esaki como un muestra di aprecio pa e trabao di Prensa. Lamentablemente no ta hopi prensa a haci uso di e oportunidad aki pa tuma e curso aki. Un curso cu qualkier otro persona cu kier tume riba su mes un gasto, lo mester saka bon plaka pa tuma e curso aki. E lesnan a wordo duna door di sra. Monica Nuboer (Dokter), sra. Yvette Thuis (Dokter) y sr. Glenn Rock (CPR-Instructor). Tur di nan ta instructornan certifica segun e norma y regla di e "American Heart Association". E lesnan a dura for di 9.00 di mainta te cu 1.00 di merdia. Durante e curso a sinja con pa perform CPR riba hende adulto y riba mucha chikito for di 1 te cu 8 anja di edad. Despues di un training basta intensivo, tur participante por a tuma nan carnet como muestra cu nan a slaag y cu awor tambe ta authorisa pa haci CPR den caso di emergencia. Un tremendo iniciativa di IMSAN y nos di Solo di Pueblo lo recomenda companianan y hotel pa tuma contacto cu IMSAN y percura pa nan empleado tambe tuma e curso di CPR. Nos no sa nunca ken su bida nos por salba majan.
.