|
Oranjestad
- 14 Januarie 2010 -
E
dia cu Senjor Dios a desvia e Lidernan Religioso!
___________________________________________________________________________________________________
Diasabra
8 di Aug. 2009, mi a publica un articulo polemico den Solo
di Pueblo unda mi a duna di concoce cu esnan cu no kier
wordo goberna pa Dios lo wordo goberna pa UN y Vaticano
(tyranonan). E articulo a cay manera un Atom Bomb riba e
pueblo christian di Aruba. Un di e pastornan menciona den
e articulo, a sinti su mes “elehi of scohi” cu
e’la bai asina lew di menasa cu “consequencianan”
y a start un “inquisicion” contra mi persona.
Un solo articulo a pone un pastor Calvinista-Evangelico
cuminsa acusa falsamente (2 Tim. 3:1-5). E’la wordo
ofendi cu e berdad! Manera nos libertador, Sr. Betico Croes
(r.i.p.) a yega di bisa, “Berdad nunca a perhudica
ningun hende, ningun causa ni ningun nacion.” Esaki
ta mustra atrobe den ki estado un gran parti di christiannan
ta aki na Aruba, incluyendo e pastornan y predicadornan,
di cualke confeshon! Nan ta yena cu amor (1 Cor. 13) y ta
lubida cu “amor ta regosiha den e BERDAD” (1 Cor.
13:6), no sintimento of emocion! Facto ta: mas iglesia christian
(no biblico) wordo lanta na Aruba, mas decadente sociedad
ta bira. Mas e pastornan y predicadornan neglisha di sali
riba caya y adverti sociedad di e maldicion cu ta biniendo
(!), mas burache nos ta lantando, mas matador, mas hende
ta comete adulterio, mas satanismo ta gana tereno y mas
nos sociedad ta cay den decadencia y degeneracion.
Sra.
Trudy Hassell di Fundashon Let’s Talk, Sra. Rebecca
Nascimento-Geerman di Teen Challange y Sr. Eric Lake di
KZP por conta storianan riba esaki. Consumo di droga y alcohol
a baha desde cu nos tin tanto iglesia na Aruba? Kico ta
di embaraso hubenil? Gangs? Abortus? Delincuencia hubenil?
Adulterio y Fornicacion? Divorcio? Pornografia? Abuso sexual?
NADA. Bo ta puntrando pakico? APOSTACIA y DECADENCIA social,
economico y spiritual (1 Tim. 4:1-2; 2 Tim. 3:1-13; 4:1-5).
Nos ta bibando den e ultimo temponan (“dianan di Lot”)
y temponan mas dificil ta biniendo (“dianan di Noah”)
pa Aruba (caida drastico di turismo; devaluacion di nos
moneda; scarsedad di awa y cuminda; blackouts; horcan cu
yobidanan fuerte; inundacion, temblor, malesa dor di vacuna
y control total). Christianidad na Aruba ta un rasa bastardo
(Hebr. 12:8), cu no tin temor di Dios pero temor di hende
(Gal. 1:10-Gal. 2:10). Dor cu e lidernan religioso (di cualke
confesion) a nenga di hasi loke Dios a mandanan hasi (entre
otro, predica riba caya!!!), E’la desvianan usando
spiritonan impuro seductor. Nan a prefera di acomoda nan
mes na e “era nobo” di positivismo (Gen. 3:1)
hunto cu nan tata (Juan 8:44), lubidando cu mundo ta riba
un “caminda hancho” (Mateo 7:13) pa fierno y ningun
lider religioso ta alertanan di e maldishon di Dios. Nan
TUR ta “complasedornan di hende” – sin excepsion!
Mundo ta stima nan! – Juan 17:14; Mat.5:11; Juan 15:20;
Echos 13:50; 2 Tim. 3:12. Unda cu Jesus yega e’la causa
“desunion” entre e hendenan. Nan no tabata guste
y despues di a traisione, nan a laga mat’e.
No
tin un pastor aki na Aruba of Antiyas cu ta sufriendo pa
e cuasa di Christo y su palabra. NINGUN. Union christian,
amor, paz, harmonia, mente positivo y alabanza a yena nan
sirbishi cu no tabatin lugar mas pa doctrina biblico. Doctrina
biblico ta separa (Juan 7:40-44; 9:16; 10:17-19; Echos 23:6-10),
positivismo y amor ta uni!
Actualmente
nos ta den e fase unda “Ecumenismo” (union entre
tur religion, fe y credo) ta den su fase briyante, unda
lidernan religioso grandi, manera Luis Palao, Billy Graham,
Robert Schuller, Joel Osteen, Benny Hinn, et al. ta unifacando
y mesclando tur denominacion hunto rumbo pa e Mama di tur
Abominacion (Rev. 17) cu su “One World Religion.”
E trabow di “union” aki a cuminsa dia 27 October,
1986 cu Papa Juan Pablo II, na Assisi, Italia, unda e’la
invita e lidernan religioso di e religionan grandi pa un
“World Day Prayer of Peace.” Mas di 100 lider
religioso tabata presente. Di aki e “union” di
e religionnan y denominacionnan a cuminsa y a plama rond
mundo y a yega Aruba via e Iglesianan Pentecostal/Charismatico,
Neo-Evangelista, Protestant y Methodista.
Tuma
nota: unificacion di tur denominacion ta un acto SATANICO
y no ta bini di Dios. Unico cos “bon” cu Dios
a uni tabata Adam cu Eva y cada Christian cu Christo, nada
otro. Tur otro cos cu Dios uni ta pa DESTRUCCION. E dicho,
“Devided we fall, United we stand” (Tower of Babel,
United Nations, One World Religion, Armageddon!) ta algo
satanico. Asina cu nos tende un hende of grupo papia di
“union christian”, “union social”, “union
politico” etc., na e momento ey nos ta tende e voz
di un spirito seductor. Divicion ta algo di Dios (Gen. 1,
10, 24) y integracion y union ta algo Satanico! E pueblo
christian mester ta uni riba doctrina sano biblico y no
union di amor, paz, sintimento, glosalalia, etc. E documentacion
aki ta trata di e desvionan religioso cu a hasi mas danjo
na nos communidad y manda hende fierno dor di sinja "doctrina
di diablo" cu di un parti, ta bini di "spiritonan
seduso." Laga nos wak con esaki ta sosodé. Un
pastor of predicador (of cualke otro persona) por ta combertí,
canando cu Senjor, deboto, etc. pero asina e cuminsá
questiona, substraí, adecí, interpreta, cambia,
nenga y trose e palabranan di Dios, Senjor lo desvi’e
y destrui’e. Ora cualke hende hasi un di e “5”
puntonan aki, Dios lo desvia e persona cu tur su bon intension
y husticia propio (self rightious).
Palabra
di Dios ta bisa, den Eze. 14:9-10, "Y si e profeta
wordo desviá ora cu e papia algo, Ami e Senjor a
desviá e profeta (pastor), y Mi lo rek mi man riba
djé, y lo destrui’é for di memei di mi
pueblo Israel (congregashon). Y nan lo carga e castigo di
nan inikidad (piká): e castigó di e profeta
lo ta hasta e castigo di esun (miembro di iglesia) cu busca
su conseho;" E versiculonan aki ta bisa cu ora cu un
pastor para predicá algo cu no ta cuadra cu Scritura,
Senjor Dios ta desviando e pastor kende ta "...papia
mentira den hypocresía..." y desviando e parti
di e congragashon cu ta kère loke e pastor ta predicando.
E resto di e congregashon cu no ta kere loke e bisa, lo
sigi nan Beibel y e Spirito Santo di Dios lo alertánan
di e desvío. Esnan cu no tende di e Spirito Santo
ta pasobra nan "tin nan consenshí marcá
cu un heró cayente..." Mayoria di nan ta asina
preocupá den “mantencion di un bon spirito christian"
y den "sinti y pasa bon den Senjor" cu nan no
a paga tino ora e Spirito Santo di Dios alertá e
congregashon. Si e Spirito Santo bandoná e iglesianan
local di awendia (di cualke confesion!!!), nan lo ripara
esaki despues di algun luna. Nan ta mucho ocupa cu mantension
di un GOOD FEELING y christianismo falso enbez di hinca
nan nanishi den e palabra di Dios! Nan no tin consenshi.
E iglesia of e pastor ta bira nan consenshi. E ta pensa
pa nan, y ta bisa nan kiko y con pa pensa. Tantén
e pastor ta "entertene" su congregasion y laga
nan sinti bon, dunandonan FEELINGS enbez di FACTO y FE,
tur cos ta na ordo, pero "don't rock the boat"
cu doctrina. Loke cada christian, of cualke pastor of cualke
iglesia pensa, kiko un versiculo ta nificá sigun
nan comprendemento of interpretasion, ta fuera di discusion.
Dios no ta interesá di sá loke cualke grupo
ta pensa di un versiculo. Imaginabo e klei ta bisa e trahador
con pa traha! Pero asina e cos ta desde Gen. 3 – PICA.
E ta interesá den "asina scritura ta bisa...comparando
scritura cu scritura...linja riba linja..."
Pa
duna mas FACTO BIBLICO encuanto e thema, mira 1 Rey 22.
Esaki ta e capitulo mas grandi den Scritura cu ta mustra
di unda doctrina falso ta bini, ta wordo propagá
y wordo kerí. E ta splica tambe pakico tin tanto
religion riba mundo. Dios ta e fuente! Mira: "Y e'la
(Micah e profeta di Dios) bisa, Tende antó e palabra
di SENJOR: Mi a mira SENJOR sintá riba su trono,
y tur e angelnan di shelo pará banda di djé
na su man drechi y na su man robez. Y SENJOR a bisa, Ken
lo persuadí Ahab, pa e bai y cai na Ramoth-gil-e-ad?
Y un di nan a bisa na e manera aki, y otro a bisa na otro
manera. Y a bini un spirito y a para dilanti SENJOR, y a
bisa, Ami lo persuadi’é. Y SENJOR a bisé,
Cu kico? Y e'la bisa, Mi lo bai, y mi lo ta un spirito enganjoso
den e boca di tur su profetanan. Y e'la (SENJOR) bisa, Lo
bo persuadi'é, y gana tambe: bai, y hasi asina. Y
asina anto, mira, SENJOR a pone un spirito enganjoso den
boca di tur esakinan bo profetanan, y SENJOR a papia màlo
concerniendo'bo." (1 Rey 22:19-23). Ken a pone y manda
un spirito enganyoso den boca di e profetanan? SENJOR DIOS.
Ora un pastor para predicá y sinja doctrina falso
(conciente of inconciente), e momento ey Senjor Dios lo
manda un spirito enganjoso pa desvi’é y persuadi’é.
Ora Senjor duné un mensahe of bis’e pa hasi
algo (predica riba caya) y e no kere den e mensahe y e presenta
un otro mensahe cu Dios no a duné (Num. 22:20-41;
23:8-30), Dios lo desvi’é, "Tende, o shelo:
mira, Mi lo trese maldad riba e hendenan aki, hasta e fruta
di nan pensamentonan, pasobra nan no a tende na mi palabranan,
ni na mi mandamentonan, pero a rechasé" (Jer.
6:19). Loke nan a determiná pa hasi den nan curazon
(unificacion, musica cu rythmonan africano como parti di
sirbishi, burachi den spirito, one world religion, ecumenismo,
etc.), sin consultá cu Dios, E'lo usa "e fruta
di nan pensamentonan" pa destruínan (mira tambe
Jer. 9:14: "Kendenan a cana tras e imaginasion di nan
mes curazon,...").
Tur
pastor aki na Aruba y Antiyas cu predica algo contrario
cu loke Dios a bis’e of contrario cu sinjansa directo
biblico, Dios lo desvie y hibe den un abismo di mentira
y desvio, pa motibo di su curason duro, ignorancia, ciegedad
spiritual of su orguyo. Asina cu cualke persona, sea e ta
Pastor, Theologo, Priester, Cardinal, Papa, Anciano, Diacono,
Guru, Consehero etc., cu cualke titulo, kere cu e por splica
un versiculo sin ayudo di e Spirito Santo of sin dividi
e palabra di berdad correctamente (2 Tim. 2:15) Senjor Dios
lo desvie! Tene cuidow con bo ta trata e palabranan di Dios
pa E no desvia’bo!
|
|
Articulo
scirbi pa
Dr. Jeffrey Di Carlo
|
|
|
|
